11 jaor Fiedelzaoterdaag

Dit jaor vindt de 11e editie plaats van de Fiedelzaoterdaag. Ein neet miér weg te dinke evenement in Domani tiédes de Boètezitting.

Ter gelaegenheid van dit jubileum laote weej Gé van den Heuvel aan ‘t waord, man van ’t iërste oor beej de organisasie van de Fiedelzaoterdaag:

Gé: ‘Veurmalig veurzitter van de BBZ , Harry Pouwels, sprook mich aan in december 2009. Hae vond det er ein spesiaal podium aan de Boètezitting toegevoeg meus waere, dinkend daobeej aan Andre Rieu’s zutjes Fiedele.

2 Maond later - februari 2010 - waas de Fiedelzaoterdaag gebaore en belaefde Domani ein ongekinde ommekier in zien historie. De kultuur- tempel waas wies det moment nog allein maar gebroèk veur klassieke konserte en ut waas bijnao heiligschennis um dees lokasie oèt te lieëne aan zoeë iets profaans as de vastelaovend. Totaal in ein vastelaoves-sfere versierde “tempel” met taps, slingers en balonne kwame al metein bezeukers in groeëte getale binnestruime. Det ware met name alde jongere en neet zoeë jonge aldere, veur wae de waeg nao Domani ein oètkoms waas. De podia in de binnestad vonde zeej te drök , te kald, te vol. En getap beer in ein glas en auk nog lekker werm binnezitte, det sprook aan.

In de beginjaore stonde vuuël tradisionele klassieke werke op ’t programma – opera en operette melodieë en klassieke instrumentale nummers – maar nao korte tiéd waas te merke, dat de Venlonaere op de zaoterdaag veur de vastelaovend veural zoote te wachte op de Venlose klassiekers. De prachtige leedjes van onder andere Boermans en Luxembourgh - Lekker windje, lekker waerke, de einzame en mien linkerbein -ze komme allemaol veurbeej. Maar aevezier de meizengers van latere jaore - Josefien, dae dan, heej dich, kiek nog eine kier um, nao ut zuje - .

En wie moeëj kinne die klinke as dan auk nog fioeële of ein salonorkès veur de begeleiding zörge. Bekinde artieste oèt Venlo traeje op, maar auk de nieje lichting van jong talent is van de partie. En ’t doorgewinterde venlose vastelaovespubliek geneet , zingk mei en sjoenkelt wies aan ut ind van ein 4 oor deurend programma. ’t Klimaat binne is prima en de geveulstemperatuur oetstaekend.
2020 is ein Jubileumjaor: 11 jaor Fiedelzaoterdaag . Der steit weer hieël waat moeëjs te gebeure. Met as bizondere vermelding, dat auk nog 2 jubilarisse (Gé Deenen en Hannelore resp. 40 en 60 jaor arties) in ’t programma mei doon. De belangstelling is groeët .

Galerie de Hoeve , die de catering en de inrichting verzörg, verdeent ein groeët kompliment, aevenas ein aantal artieste : de Oldtimers o.l.v. Marianne Scherjon, ‘t Fiedelorkès, ‘t orkès Underste Baove en ein aantal vreejwilligers, die al 11 jaore op rie telkes de basis loge veur de zoeëvuuëlste geslaagde Fiedelzaoterdaag.
Domani is noow al weer 11 jaor ein neet te misse, hièl bizonder binnepodium veur eine spesiale doelgroep in Venlo. ’t Zörg veur de echte venlose vastelaovessfeer, zoeë wie de Fiedelzaoterdaag-bezeukers det van vreuger oèt gewind zien.

Het Stadscomté B.B.Z. haet der 11 jaor geleeje good aangedaon, um auk dit podium te ondersteune en binne de verantwoordelijke vleugels van de organisasie op te neme. Ik zoel zegge : op nao de volgende elf.’